Ascolta questo articolo in podcast su Spotify.
Gli altri articoli di “Ladino e dintorni”
L’ultima domenica d’ottobre, si è rinnovata in Ampezzo la tradizionale elezione di due nuovi Rappresentanti per ognuna delle due Regole Alte che amministrano il territorio.
Domegna ai 26 de otobre, cemodo che se usa fei da trope anes, i regoliere anpezane i é stade ciamade a bete su i rapresentantes noe de Regola Outa, doi par chera de Larieto e outre doi par chera de Anbrizora.
Pa ra Rapresentanza de Larieto, agnoche – dapò i dodesc ane da fei drio l Laudo – aea fenì l sò laoro Massimo Alverà Pazìfico e Alberto Menardi Mìlar, i à votà de 349, con 346 vote boi, e l é ‘sù inze Massimo Alverà Tìnele e Marco Alberti Minèl (Panza). Pa ra Rapresentanza de Anbrizora, inveze, agnoche aea fenì l sò laoro Gianluca Lancedelli Iéza e Carlo Dipol ‘Sèpel, i à votà de 311, con 305 vote boi, e l é ‘sù inze Massimo Lacedelli Mèlo e Corrado Majoni del Vecia.
I cuatro regoliere i restarà in Rapresentanza da ades fin del 2037, e canchelé i doi pi vece i fejarà i Marighe e chi outre i Cuietre de ogni Regola. A ra votazios, che l é usanza ciamà r ultima domegna de otobre, propio canche l é tornà r «ora solare» e on poussà na ora de pi, sta ota l é vienù danoo na bona fré de Consortes, che i à dà l bon azeto a ome stimade e che, par chel che i sà e i pó, pa ra Regoles i se dajarà da fei de seguro polito.
Par ci che varda da fora, ma anche par chi paesane che i no sà, no n é tanto fazile capì cemodo che el và l «machinario» de ra Rapresentanzes de Regola che, coi Marighe betude su an par an, es à da fei el ben de Larieto e Anbrizora, de ra montes, ra stales e dei refuje che l é su sun chel de Regola.
Ci che scrie l é stà Rapresentante de Anbrizora dal 2001 al 2013: l à fato chel che l podea e l à passà na dosena de anes longhe ma biei, che l se sente de consilià ai ‘soen che i vien drio de nosoutre. Ra Regoles l é un piloto stagno de ra storia, de ra cultura, de r economia e de ra natura de ra val de Anpezo, e l é bisoin che i Consortes i res feje prozede segures ancora par trope anes, ignante che i afare, i sode e ra menades de trope che i rua ca da agnochemai i feje massa dane.
Nesto Coleto
