- Le rubriche -

Ladino e dintorni

Ra cresta sbujada fora coi corne dal diou

Ascolta questo articolo in podcast su Spotify.
Scrivi «ladino» dentro “Trova in questo show” per ascoltare tutti gli altri podcast nelle parlate bellunesi.

Una peculiarità naturale d’Ampezzo ricorda una leggenda comune ad altre realtà alpine e raccontata dal grande etnologo Karl Felix Wolff, che l’aveva appresa da Sandro Lacedelli da Meleres.

Che se dezide de ruà fin là da sora in ‘sò, da chel souto agnoche anes indrio l amigo Julio Ieza l aea tirà un funazo de fer che el no n é pi; o che se vade là da Lerosa, intrà i barance e ra graes dal ver de ra Val de Gotres, el Busc de r Ancona el strionea ancora calchedun. Outo almanco vinte metre, jaà fora inze ra croda rossita de ra cresta intrà ra Croda de r Ancona e i ‘Suoghe, chel arco se l vede su polito dal stradon de Alemagna, nafré ignante Sorabances, e l é un posto che fesc spaco dassen. Conpain de trope outre buje de chera fata, anche el l à ra sò storia, che suposò l é senpre chera par duta res Alpes. Inze un sò libro, drio chel che el i aea contà del 1903 ra guida Sandro da Meleres, Karl Felix Wolff el scriea che na ota su par chi toche buje no in ea: ma, no se sà can, ra cresta ra sarae stada sbujada fora coi corne dal diou, che l pioan l aea fato scanpà de oga da ra val canche i anpezane i é deentade cristiane.

In tenpo de guera, el Busc l ea conosciù parceche ai Taliane – che i aea chera de bete ra mas su pa ra cresta e ciapà Son Pouses – da lassù i aea tocià tornà indrio sote ra bonbes. Propio su par pede l Busc se passa a fei chera traersada zenza né tabeles né taces de color che da ra Croda de r Ancona ra rua fin via dai ‘Suoghe. Dinultima, el sito l é nominà anche parceche lassù, canche l é gnee, calchedun l à fato una de ra zento e passa montades coi schie fora pista in Anpezo, inventada da Nina Bartoli Ford che, via par l inverno del 1984, r aea darsonto el Busc da Gotres e r ea ‘suda ‘sò, fosc pa ra prima ota, pa ra graa del Ru de r Ancona fin a ruà sul stradon.

Conosciù o nò, l é un cianton de ra nostra val che a alcuante el i sà senpre gran bel. Dapò deboto zincuanta ane dal prin colpo e trentazinche dal ultimo che chel strafieron del Coleto l à abù ocajion de passà fora par el Busc e vienì ‘sò par chi sassate del ghebo, el se i pensa ancora.

Nesto Coleto