- Le rubriche -

Ladino e dintorni

L ea na ota e ra no n é pi

Ascolta questo articolo in podcast su Spotify.
Scrivi «ladino» dentro “Trova in questo show” per ascoltare tutti gli altri podcast nelle parlate bellunesi.

Un pensiero a un luogo singolare ai piedi della Croda Marcòra, nella zona interessata dalle grandi frane di questo periodo, che l’hanno completamente sfigurato: l’«Albergo de Peniés».

L ea na ota, e ra no n é pi, na bela pala verde con inze meso un clonc che el someaa na fonja, agnoche ‘sà anes e anes i pastore da San Vido i menaa ra fedes. Par chesto, lassù pede el bosco i aea fato su anche nafré de cason par se bete a sosta, che alcuanta cartes es menzonea col gnon de «Baita Peniés», ma l ei sentù ciamà anche «Albergo de Peniés». Del 1991 el casoneto l ea ancora là, petà ‘sò ma coi pale e ra brees ben conbiade; anes dapò, canche on scomenzà a ‘sì su pi despes el no n ea pi, e i cazadore i aea fato su na cianà pa ra besties che despes es passaa a pelucà.

Duto bel, solo che chera pala r é propio sote i crepe de ra Croda Marcòra, e i sasc che vien ‘sò da de sora i ciapa doi ghebe: chel pi gran, a man dreta de ra pala, el fenisce sul stradon là dal Ponte del Venco, agnoche passaa ra farata fin del 1964.
I ultime gran sguaze che i à netà ‘sò el paré de ra Marcòra e i crepe là de sote, i à mandà ‘sò cuintai e cuintai de jera par chel ru suto che l passa de fora de ra strada da bosco de Peniés, agnoche na ota no n aasson mai pensà che sleziasse ‘sò chera volmenera de material. Dal 2014 no son pi passade da chera e no saon outro, ma me par de capì che ra roes es see vienudes ‘sò propio de là, alolo de fora de ra cianà agnoche aon stà chinesc otes a se passà doa ores in santa pasc; e soralduto, i m à contà che ra jera r à ciapà inze duta chera bela pala agnoche par secui chi da San Vido i à monteà i sò rodui e nosoutre se fermaon a ciapà el sol.

Se sà ben che duta ra fazada del Sorapisc che varda ves el stradon de Alemagna, da Agabona infin fora a Ciapuza, ra no stà e ra no stajarà mai ferma; e manco màl che inze chi bosche l ea solo do o tre troes e ‘sente che scarpedea in é de seguro poca. Nosoutre saon de chi che, par un gran toco, su par sote i grebane del Sorapisc i à fato almanco un ‘siro al an, se nò de pi: da ca inaante no se pó pi fei conpain de na ota.
Nesto Coleto

Tutti i testi di Ladino e dintorni