Ascolta questo articolo in podcast su Spotify.
Scrivi «ladino» dentro “Trova in questo show” per ascoltare tutti gli altri podcast nelle parlate bellunesi.

Un secolo dopo, ricordiamo la «Baracca Dibona», una casermetta eretta nel 1916 dal Regio Esercito Italiano alle pendici del Passo del Cristallo, ricca di storia ed oggi in triste disfacimento.

Su ra man, ci che el sà ce che l ea, e soralduto agnoche r ea, ra «Baraca Dibona»!

Con chel gnon, ci che l à nafré de pratega de ra storia del Noezento de Anpezo e de ra nostra crodes, el ciama ra casermeta fata su ai 18 de maso del 1916 dai melitare taliane suposò a 2700 metre, su par pede i paréa del Piz Popena e poco sote ra Forzela del Cristalo, che ancuoi come ancuoi l é beleche duta na majiera.

Drio l casal, anche ió cardee che l gnon de ra Baraca l fosse leà a Anjelo Dibona Pilato, guida dal 1907. El Pilato, però, in tenpo de guera l é stà fora del paes, sul Isonzo, sul Mangart e dapò su ra Presanella e ra Busazza, a bete ‘sò pale e tirà fire del telefono su par parés agnoche outre melitare i no ruaa, e mai sul fronte de Anpezo. I m à contà inveze che ‘sà zento ane, intor el 1925, Anjeluco Pilato l aea pensà de domandà ra Baraca e de fei fora lassù nafré de refujo, agnó baitorà e i dà aloso a ci che i ‘sia su pa ra crestes del Cristalo o del Piz Popena là daejin.

D auton del 1945 el Club Alpin Talian, Sezion de Anpezo, l aea pensà de i bete man a chi cuatro murate par recordà Carlo Valli e Fernando Grandori, doi ‘soen che i ea tomade ‘sò da ra Via Solleder sul Civeta e i ea stade sturtade su dal Vecio, Bibi, Bocia, Iji, Baa, Boni, Mani e Bortolin, oto de ra Schirates pi fortes de incraota. Canche l é stà ra fin, el «bivaco» intramèso el Cristalo e l Piz Popena el no n é stà pi fato, anche parceche sode no in ea assei, ma a Valli e Grandori i é stà dedicà istesso un fabricato a peròn, via pa res Alpes Retiches.

‘Sà cuaranta ane pi o manco, chera vecia pensada del Cai r é soutada danoo fora; s aarae vorù i bete man a ra Baraca par tramudà lassù el «Bivaco Pia Helbig Dall’Oglio», daerto del 1965 in Val Montejela ma senpre pi sacagnà inze i anes da ci che l doraa par se fei ra vacanzes d istade a maca. Anche chel projeto l é vanzà là, sote ra majiera de ra Baraca.
Nesto Coleto

Tutti i testi di Ladino e dintorni