- Le rubriche -

Ladino e dintorni

Un cianton che me despiaje de no n aé mai vardà

Ascolta questo articolo in podcast su Spotify.
Scrivi «ladino» dentro “Trova in questo show” per ascoltare tutti gli altri podcast nelle parlate bellunesi.

Andando dal Passo Tre Croci verso Misurina, sulla destra si nota una massiccia sommità, della quale nessuno parla mai.

A ‘sì da Son ‘Suogo ves Misurina, se dal ponte sul Rudaoi se varda a man dreta, s intia doi spizoi, che i s indora sul fiorì del soroio. Chi spizoi, che i se sporse ves el troi del lago del Sorapisc, l é ra doa Zimes de Marcoira, ra Nord Est e ra Sud Ovest, che l é ra pi outa.

Su par pede in é anche un terzo, che l no n à un gnon «storico» e – fora che inze calche libro vecio – no l menzona mai negun. El spizon, che el fesc vede un bel paré ves i bosche de sote, l é stà bateà «Anticima di Malquoira»; el gnon i l à betù del 1937 el Conte Sandro del Torso, che sui parés intor el Ciadin del Loudo, in chi anes l aea ciatà fora sié via noes.

Del Torso, un furlan che l aea passà i zincuanta, ma l seguitaa a scarpedà su pa ra Dolomites sbalzin come na ciamorza, el s aea incaprizià de ra Anticima. Coscita, ai 19 de agosto del ‘37 l à menà su na sò amiga da Trieste, Fernanda Bukovnik Brovedani, su par un bel spigo.

Fin che i ‘sia su, i vardaa via l paré su par pede; sete dis dapò del Torso l é tornà lassù con Ilde Scarpa, ra prima femena da Venezia a fei vies de 6° grado. Né l spigo né l paré de r Anticima i no n à fato spico inze ra storia de ra Dolomites, ma – se i no n é sboade ‘sò – ‘sì su de là no n aarae da esse tanto mal.

Su ra Zima Nord Est, ra pi bassa, on stà su despes, ma no n on mai pensà de ‘sì a curiosà su r Anticima; ra darsonse da sora in ‘sò, via pa ra pales che es rua inze l Ciadin del Loudo e agnoche na ota i anpezane i paraa su ra fedes, no n à da esse cissacé.

R Anticima l é un cianton che me despiaje de no n aé mai vardà canche s-ciassignaon tante site fora man. El Ciadin del Loudo e ra zimes là de sora l é duto biei poste; i no n é massa indalonse da strades e refuje e, duto fato, gnanche massa strapazade, s incroja ra ciamorzes e algo de noo da ciatà fora l à ancora da esse. Nafré de piaza penso che ra see propio su r Anticima: se calchedun el ra varda via dal stradon e l à l estro de curiosà dei vece, el podarae i dà un ocio.
Nesto Coleto

Gli altri articoli di “Ladino e dintorni”