Ascolta questo articolo in podcast su Spotify.
Scrivi «ladino» dentro “Trova in questo show” per ascoltare tutti gli altri podcast nelle parlate bellunesi.
Qualche tempo fa, a pochi chilometri da Cortina, scoprimmo un rudere misterioso, del quale non abbiamo ancora trovato notizie sicure.
In Anpezo on cazà el nas nafré daparduto, e na vita ra no n é assei par tamejà na val granda come ra nostra. Ma son senpre curiosc, tanto che na domegna tornaon da Misurina dapò de aé merendà al Lago d Antorno, e on indujià drio i murate de na ciaseta su par pede el ponte noo del Rudaoi. I aon senpre vedude là, e on fato pi de na ota un troi che el moe da là, ma a chi sasc no s aon mai indurà a i dà na ociada.
Lascion ra machina visavì, scaazon el stradon, e sora doi sciaris de piera ormai fruade son ruade inze un posto del duto noo. Tre locai cuadrate de 3 metre par 3, tre cassamates de portes e cuatro de funestres; anche se i seramente i é sparide da cissacuanto, i anes i no n à ancora scofià chera ciaseta. Doi locai i ea nete, zenza spazadures, el terzo inveze l ea pien de pedalìs e brusces cresciudes su garies.
Vardon daante, daòs, a man dreta e a man zanca, e da sora in ‘sò: ce saralo mai stà chera ciaseta pede l bosco sote i Crepe de Rudaoi, poco pi in là de chel che fin del ‘18 l ea l confin intrà r Austria e r Italia? Saralo stà na caserma, fata su par vardà l confin? Anche se de inze no se vedea segnes de liete, toures o mobilia, s intiaa el pè de un fornel e de fora parea che fosse stà anche un comedo. Se l ea na caserma, r ea ben strenta par i dà aloso a chi alcuante melitare, che par stà de sguaita sul confin i ea assei sacrificade!
Podarae esse stà na ciasa del Dazio, par controlà ci che ‘sia o vienia intrà Anpezo e Misurina o ci che menaa roba intrà l Tirolo e l Veneto, mangare de strafujo? Pó esse chesto e anche chel; de preziso no saon nuia, e reston a crede che fosse na ciasa par cantoniere o finanziere, che ‘sà anes anorum i ea obligade a stà là d istade e mangare anche d inverno, col crudo e l gnee che l é su par chi perghe.
Se fejon de mereea, e speron che l no suzede mai, che cissacì no n ebe pensà de valorisà chi mure, che se vede da na strada agnoche l é senpre pi resiro e basta cuatro pasc par darsonse!
Nesto Coleto
Gli altri articoli di “Ladino e dintorni”
Seguici anche su Instagram:
https://www.instagram.com/amicodelpopolo.it/
