Ascolta questo articolo in podcast su Spotify.
Scrivi «ladino» dentro “Trova in questo show” per ascoltare tutti gli altri podcast nelle parlate bellunesi.
Su questa pagina mi propongo di non seguire fatti legati alle Olimpiadi Invernali 2026; faccio un’eccezione, per sottolineare un bel lavoro quasi concluso.
Intrà dute i laore leade a ra Olinpiades che ruarà cade cuatro mesc, un dei poche che ei vedù da pede l é ra ciasa agnoche sarà logade i poliziote de Comun. In Anpezo, che me recorde ió, par dosenes de anes i poliziote de Comun i aea aloso al pian tèra de ra Ciasa de Comun, e i ei senpre abude visavì, asà che da ‘soen stajee, e ancora ades stago là pede. L ufizio l ea pitosc strento e descomodo: el personal, par fortuna, el cresce e coscita ultimamente i poliziote i ea stade tramudade su in Stazion, agnoche dedignante l ea un ufizio de ra Comunità Montana de ra Val de ra Boite.
Ades coi laore anche lassù l é duto un cuarantaoto, e donca l ea bisoin de i dà ciasa a chi lourantes, che i fesc chel che i riesce par tienì in ordin el gran resiro de camion, camper, corieres, machines e moto che on inze ra val ormai deboto duto l an.
Coscita i à loudà de i bete infinalmente man al touladel in via San Franzesco, iusto sote ra ciasa del Comun. Poi dì che l toulà, de len al pian che varda ra strada e de muro ‘sò sote l stradon, l ea propio na cadrea da almanco zincuanta ane, ormai bon solo par i jate e poco pi. Me penso che, co se jea famea, là sote aea stà par nafré Franz Gasser co ra sò femena e oto pize, epò aea abù ra botega un caligaro Pocchiesa; ma no n ea pi na ciasa, e inze meso Cortina ra stomeaa dassen.
Ades i à ciapà inze, ancuoi che scrio i laore i và ves ra fin, e cade nafré aaron na ciasa noa lujente propio inze meso Cortina. Despiaje par i jatorìs e par ci che i dajea da magnà, che i aarà da se ciatà un outro sito; speron che ci che ‘siarà a lourà là i ebe comodo, e che se vade ancora adora a bete calche machina là daejin (fin ‘sà alcuante mesc, intor el toulà l ea noe poste agnó poià ra machina!).
A ra fin dei conte, de chel touladel (cuerto de sciandores da un metro e vinte, nò da 58 zentimetre cemodo che vorae ra tradizion anpezana, el me disc un marangon!) vanzarà un recordo longo depì de 50 ane.
Nesto Coleto
Gli altri articoli di “Ladino e dintorni”
Seguici anche su Instagram:
https://www.instagram.com/amicodelpopolo.it/
