Ascolta questo articolo in podcast su Spotify.
Gli altri articoli di “Ladino e dintorni”
Nei giorni scorsi è stato presentato presso la Cooperativa «Cortina Gioco d’Ampezzo», un gioco da tavolo che fa conoscere divertendo quanto di più interessante la conca ampezzana offra ai suoi ospiti.
L ea ben un bel ciapo de ‘sente, sabeda ai 29 de noenbre dapò disnà su inze l local «The Roof», sote cuerto de ra Coperatia, a ra presentazion de «Cortina Gioco d’Ampezzo», el «’sogo da toura» inventà da Loris Osualdella e dissegnà da Fabio Vettori, che l mena ci che ‘suia propio inze meso ra Dolomites, intrà pistes da schie conosciudes inze l mondo, boteghes de lusso e ra mereea dei bosche, ra crodes, ra montes e i prade.
Insoasada da ra zimes pi beles del mondo, ra val de Anpezo (che ormai par trope l é deentà solo «Cortina») r à duto chel che se sà: l é patrimogno de r Unesco, ra rejina dei sport da d inverno, un paes agnoche vien fato un grun de gares, agnoche ‘sà setanta ane l é stà paricià ra VII Olinpiades e cade un pei de mesc, con Milan, Bormio, Predazo e Antholz, vienarà fato cheres del 2026.
Pede ra pistes, i hotiei e i refuje, ci che vien in Anpezo el ciata de duto, de dì e di note; restorantes agnó magnà gran ben, boteghes agnó ciatà roba fina dai sarvije ai scarpe e ai ore, ostaries; d istade, un anbiente ancora tienù polito, agnoche se ciata chilometre de troes da caminà, se pó ‘sì in croda, fei ferates, ‘sì co ra roda, l é tre musee da vede co no n é bon tenpo: insoma, no se se stufa de seguro. Dinultima, in ciou de nafré inze ra val l é ruà el cinema (ra prima ota l é stà del 1927!) e ra television con laore come «Vacanze di Natale», «007 Solo per i tuoi occhi», «Cliffhanger» e ultimamente «Un passo dal cielo». Par Anpezo l é passà rés e rejines, pitore come De Pisis, Carrà, Sironi; scritore come Hemingway, Moravia, Comisso, Parise; jornalistes come Montanelli e Biagi, e outre.
Inze l ‘sogo, duto chesto el vien vedù co l ocio e ra man sbelta de Fabio Vettori, artista trentin conosciù e stimà pa ra sò «formies»; el laoro l é vienù fora bel fresco, adatà par grei e pize che i se ra godarà a ‘suià come col vecio «Monopoly» de canche saon famea.
Nesto Coleto
