Ascolta questo articolo in podcast su Spotify.
Gli altri articoli di “Ladino e dintorni”
«Vosto che tin conte una?»: un libro che ha avuto una buona diffusione e riscontro di pubblico e del quale forse occorrerà una ristampa.
«Lòudete zesto, che t as na bela mantia», dijea i nostre vece canche calchedun el se blagaa massa de algo che l aea fato o dito. Doro chel dito anche par me, asà che voree tirà ra somes par via del ultimo libro che ei scrito, «Vosto che tin conte una?», vienù fora da ra stanparia Print House de Pian da Lago ai prime de jenaro e, se pó dì, oramai fenì!
No n ei vorù in stanpà un scento de copies, col festide che mangare, a ra fin dei conte e cemodo che m é capità outra otes, min vanze nossicuantes in ciasa: i libre i dora un grun de piaza, i pesa, i porta polar, donca l é bon che i vade fora!
Sto ultimo laoro, conpain del «Zibaldone Ampezzano» vienù fora del 2019 e stanpà da ra nostra Coperatia, l é dedicà a ra parlada anpezana, con 250 e passa dite, gnomes de luoghe, paroles despes da ride: l é na racolta de perles del saé de Anpezo, robes che se sente da anes anorum e che es ‘soa a i bete nafré de pear su ra nostra parlada. L ea anes che scotae ra ‘sente che parla, canche lourae e ades che son a ciasa: ei senpre sturtà pede dite e gnomes de luoghe anpezane agnoche ei stà e m ei senpre domandà da agnoche i ruasse: co l é stà ra fin, me par de esse ‘su adora a s-ciascignà trope ciantoi de ra storia de chi dite, chi gnomes e chera paroles, e me par che l «esperimento» l ebe abù l bon azeto de trope che i à acaro del anpezan e che, sote sote, i despiaje che tropa robes es vade strazades, e fioi e neode i no sepe pi e i no s inderete a tienì da conto.
Solo par menzonà calche gnon scondù intrà ra crodes: cuante elo che sà algo de pi de ra Cuinta Cenja, del Sas da Pèra, Testaccio, de ra Wienertürme, de ra Zieta e de un grun de outre site? L é duto gnomes leade a stories, che ei vardà de curà su e scrie parceche es reste e es invoie anche calchedun outro a conosce!
On un gran bel paes, ma ra nostra cultura, che r é fata de ra parlada, dei dite vece, dei gnomes de luoghe, se no se ra precura almanco nafré, ra no durarà in eterno!
Nesto Coleto
L’articolo è pubblicato nell’edizione cartacea dell’Amico del Popolo n. 11 del 12 marzo 2026, in distribuzione questa settimana (su abbonamento, in edizione digitale e in edicola).
