Ascolta questo articolo in podcast su Spotify.
Gli altri articoli di “Ladino e dintorni”
Tra gli anniversari che costellano la storia d’Ampezzo, il 2026 ne porta uno particolare: alla fine dell’estate cadrà infatti l’80° della posa della cosiddetta «Madonna della Solitudine».
Sto an se podarae recordà un grun de dis natalizie de ra storia anpezana: da chi pi grei come i 70 ane de ra prima Olinpiades a chi che varda ra crodes, come i 80 ane dei tre spighe de Tofana de Rozes (el Prin, el Terzo e chel del Pilastro); da ra laina del Gran Poz in Marmolada, agnoche ‘sà 110 ane l é restà chi trezento melitare, e un l ea un anpezan, Alessandro Cassiano Zardini Noce, ai 130 ane che l é morto un dei nostre pitore pi varentes, conosciù anche fora del paes, Bepe Ghedina de chi de Tomas; e ‘sò indrioman, sin pó ciatà cuante che se vó.
L é anche un dì che poche i conosce, anche se a passà lassù se l vede scrito su pa ra croda: i 80 ane da canche, ai 29 de setenbre del 1946, i paesane Minato de Zanna Bianco e Guido Ghedina Ponuco i à deziso de bete na madona de ‘ses inze na nicia de ra croda de ra Jeralbes, intrà Ra Stua e Fosses.
Ra nicia r é là agnoche s incroja doi troes: un el rua su da Cianpo de Crosc par el Pian de Socroda e l mena a chel che na ota l ea el Bivaco Dall’Oglio in Val Montejela; chel outro l é chel che l aarae l numero 0, e l mena via par sora i Crepe de Socroda fin da ra Crosc del Grisc e su ra Monte de Fosses.
Ra «Madonna della Solitudine» r ea coscita conosciuda che r é deentada el gnon de chel luó e se ra ciata sun duta ra cartes. Pede era, coi anes l é stà poià là anche na taela piturada che ra recorda na tosa morta su pa ra crodes, e da calche an na tabela de metal, betuda su dal Cai de Anpezo par recordà l Bivaco Dall’Oglio, che del 2013 l é stà petà ‘sò dapò anes e anes che l ea stà tienù senpre pi malamente.
Incraota Guido e Minato (che l é tornà su da ra «sò» Madona del 1982, de otantassié ane) i aea vorù bete lassù ra statua come seign de deozion, almoto par dì gramarzé al Signor che l ea fenì ra guera, Anpezo e ra nostra ‘sente i no n aea padì massa desgrazies e ra vita r ea tornada. Un bel pensier, che l no n é stà desmenteà.
Nesto Coleto
L’articolo è pubblicato nell’edizione cartacea dell’Amico del Popolo n. 12 del 19 marzo 2026, in distribuzione questa settimana (su abbonamento, in edizione digitale e in edicola).
