Ascolta questo articolo in podcast su Spotify.
Gli altri articoli di “Ladino e dintorni”
La «Crosc del Macaron» sotto il Bèco de Aial, vecchia di oltre un secolo, è scomparsa, forse demolita per vetustà: ora la radura è vuota, ma pare che qualcuno abbia in mente di ricostruirla.
Inze ra val de Anpezo l é un grun de crojes: de len, de fer, inze ra viles, dalongo strades, su su ra monte, su in son de tropa crodes. Tantes es é veces, alcuantes es é stades betudes danoo in pès ste ultime anes, e calcheduna ra no n é pi, parceche es no dura in eterno.
Alcuantes es à un gnon e nafré de storia, longa anche pi de zento ane: ra Crosc del Grisc (1848), ra Crosc de Ester (1889), ra Crosc del Pomagagnon (1950), fin a chera su su ra Ponta Negra del Sorapisc, spontada su del 2024. Cemodo che l à scrito un amigo sun na gaseta, l é un pecà che no see pi chera, scarma e poereta fin che se vó, ma co na bela storia drio, ciamada «del Macaron» parceche r ea betuda sun chel pianuscel inze l bosco sote l Bèco de Aial, agnoche l é el Cason del Macaron. Da chera gaseta ei abù acaro de saé che «l é ben calchedun che l é drio a pensà sora de ra bete danoo».
In ciou de nafré souta fora ci che l no vorae che, massima su in son de ra crodes, se betesse su crojes, par rispeto de duta ra relijos de ra ‘sente che vive inze sto mondo; se pó anche esse dacordo con lore, ma se ra crosc ra no n é tanto granda, se r é mangare de len, se no n é tacà su sbrendoles de tera che vorae someà bandieres, parcé no res bete?
A ra Crosc del Macaron, ma no sei parcé, son tacà pi de outres, tanto che ‘sà un pei de anes un guardia de ra Regoles el m aea anche domandà de scrie ‘sò nafré de storia pa ra bete su sun na tabela pede ra crosc; ades, inze chel bel pra pede l Cason agnoche passa anche el troi che el mena su fin dal Lago de Federa, no n é né crosc né tabela, e me sà propio pecà.
In ogni cajo sarae contento de vede danoo sul pian sote i crepe del Bèco d Aial ra Crosc del Macaron; ra recorda un por pastor, Albino Pompanin «de Colonba» da Cianpo, che del 1912, un dì che smaiaa, el s aea tirà a sosta sote na pianta e l é stà ciapà da na saeta, e ciatà morto dal Marigo de Cianpo de inalora!
Nesto Coleto
L’articolo è pubblicato nell’edizione cartacea dell’Amico del Popolo n. 13 del 26 marzo 2026, in distribuzione questa settimana (su abbonamento, in edizione digitale e in edicola).
