55 anni fa, grazie all’insegnante d’italiano, sul giornalino della classe 1a D della Scuola Media di Cortina scrivevo il mio primo pezzo da pubblicista «in erba»: ovviamente, di montagna!
Sote Nadà un mè amigo el m à domandà canche ei scomenzà a scrie, a «paciugà cartes». Aee senpre in mente l an 1983, canche ei contà sun na gaseta de na via in croda agnoche aee stà con Michele l an ignante. Inveze nò, duto l é suzedù del 1969-1970, canche fejee el prin an de ra Scora Mesana e co ra professoressa Betty Menardi (del Royal) de sète aon betù aduna «La nostra valle- numero unico dedicato a Cortina dagli alunni della 1a D».
I «redatore» de chera prima gasetuca l ea Ernesto, Manuela, Alessandro, Roberto, Nico, Caterina e Daniela; i sfoes i ea stade scrite ‘sò a ciclostile, cemodo che se fejea inalora, co ra machina da scrie Olivetti M 40 de mè pare, che ra pesaa alcuante chile e aee portà da ciasa a pè fin ‘sò a scora. Ben, a pajina 13 de ra gaseta, che ei betù via inze na casseta, l ea el mè prin articolo, che el no podea contà outro che de croda! L aea gnon «Marino Bianchi», e l recordaa Marino Fouzigora, na guida che r ea tomada ‘sò co na sciora da ra Cima del Lago sora el Lago del Lagazuoi ai 21 de otobre del 1969, e a ciasa r aea lascià ra femena e cuatro pize.
No saarae dì se calchedun el m aea dià a bete ‘sò chera alcuanta righes; vorarae crede de nò, parceche nafré de vena e de estro i no me manciaa de zerto.
Canche ei daerto danoo chera pajines m é vienù nossicé, a pensà che l é oujorà via 55 ane da canche ei scomenzà a paciugà cartes, e son ancora drio! Soralduto m é vienù da pensà a chi anes de scora, a ra professoressa che r é morta ormai da un toco, a chera tosates e a chi tosate che i ea a scora con me: alcuante i é ancora ca, alcuante i à lascià ra val de Anpezo e calchedun el pousa ormai inze porteà. Se l é vero che se recordà de preziso tanta robes capitades ‘sà trope anes vó dì stà ben de testa, alora chesto el val anche par ci che scrie. L articoleto de Marino Fouzigora l é stà el prin pas de na strada longa, che ra no n é de seguro fenida.
Nesto Coleto
