Ascolta questo articolo in podcast su Spotify.
Scrivi «ladino» dentro “Trova in questo show” per ascoltare tutti gli altri podcast nelle parlate bellunesi.
Restando in montagna in quest’estate convulsa, una modesta proposta per alleviare il proliferare di incidenti e soccorsi sulla martoriata Croda Marcòra.
St istade, se sà, ra Croda Marcòra ra se remena pi dei anes passade, e nossicuante metre cube de sasc e jera i é sleziade ‘sò da ra ponta ves el stradon sora Dogana. El paré che se moe senpre de pi l é outo 750 metre e sote de el, via pa ra «Cenja del Banco», passa na ferata conosciuda, ra «Francesco Berti». Fata su del 1966 par leà el Lago del Sorapisc con Forzela Granda e fei l ‘siro de duto l Sorapisc, chera ferata, par conto mè, ra no n é mai stada del duto segura.
Su su ra Cenja, conosciuda da anes anorum dai cazadore, se ruaa zenza tanta faraza. Na ota fenì ra cenja, inze meso l paré moe ‘sò un troi che l rua a Dogana, erto, slizego, pien de jera, sasc e radijes; l à da esse un dei troes manco mesteghe de ra val. ‘Sà alcuante dis ra ferata e l troi i é stade sarade con stanjes de fer e doi tabeloi con scrites par talian, todesco e ingleje, coscì che no se pode ‘sì via e no se pode pi dì che no s à vedù ra scrites e i feres. El sito l é paricolos, par ci che aesse da passà e se ciatà malamente, ma anche par i elicotere e i ome che i à da ‘sì lassù a strutà su chi sturloi che i s inpianta.
Ce elo da fei ancora? Par me, sarae da ciapà corajo e desfei del duto ra ferata: sià ‘sò i ciode, despiantà cordes e sciares, despenà i segnes e lascià che ra Cenja del Banco e ra «Teraza» de ra Marcòra es torne cemodo che es ea ‘sà setanta, zento, mile ane. I dijarà che sarae un dan par i inpiante che mena su par outo, par i refuje, ra guides, ra cartes e i libre che tociarae canbià, el reclam a ra Dolomites: ma credo che s i fejarae solo del ben a ra Marcòra, che ra no tornarà de seguro mai cemodo che r ea e ra se moarà ancora, col ris-cio de se desfei senpre de pi.
L é ora de ra fenì de ‘sontà roba noes su ra Dolomites, inpiante, refuje, bivache, ferates; agnoche se pó l é da desfei, nò solo ferates scadarlides, bivache deentade chipes, troes che sin và in fasc, e netà via agnoche se s à falà a tormentà ra natura!
Nesto Coleto
Tutti i testi di Ladino e dintorni
Seguici anche su Instagram:
https://www.instagram.com/amicodelpopolo.it/
