Ascolta questo articolo in podcast su Spotify.
Scrivi «ladino» dentro “Trova in questo show” per ascoltare tutti gli altri podcast nelle parlate bellunesi.
Oggi portiamo i lettori a scoprire virtualmente un angolo d’Ampezzo tanto suggestivo quanto poco noto: la «Graa del Pesc».
Un sito che se pó vede da Cortina, ma l no n é massa conosciù né zapegà, tanto pi inze ste anes, che ra crodes es se fregorea senpre de pi, l é ra Graa, o l Graon, o l Canalon del Pesc. Sarae chel gran caneo pien de sasc e de jera che l vien ‘sò dai crepe de ‘Sumèles intrà ra Pala Magra e ra Sela del Comandador, e a l vardà da sote in su el fesc vienì in mente un pescion co ra coda voltada inaante. Dal gnon se vede alolo ce che vó dì «liese» l anbiente, par capì cemodo che i nostre vece i à bateà tante site.
Calchedun el sore fei ancora ra Graa in ‘sò, par scurtà l troi a tornà indrio da ra 3a Cenja del Pomagagnon. Se sparagna algo, ma vó esse nafré de chera che se disc, gouja che no n é troi né segnes, ma solo gran peroi e jera dura.
El prin colpo che son vienude ‘sò pa ra Graa, e me par che in chi anes ra zapores es ea propio rares, l ea del ‘76 dapò de aé fato ra 3a Cenja con pare e mè fardel: aee ancora da conpì disdoto ane. Al refujeto de Col Tondo s aon fermà a bee algo, ignante de tornà a ciasa; e là Bepe Leon bonanima l aea tirà fora chel gnon, che no n aee mai sentù.
Dapò de incraota, son ‘sù danoo un pei de otes ‘sò pa ra graa; ma ancuoi, anche se aesse r ocajion, no sei se oussarae pi l fei: cissà cemodo che ra s à redoto! In ogni cajo Graa, Graon o Canalon del Pesc che see, l é solo un dei vinte e passa gnomes dei crepe de ‘Sumeles, da ra Ponta Erbing fin via in Sonforcia. L é duto site che i conta stories de laoro e de struscies, agnoche na ota i zapegaa su e ‘sò con fadia e riscio par seà e dapò menà inze toulà calche brancia de fen, e agnoche l é capità anche calche desgrazia.
Ancuoi se và a strafier tropo anche co ra roda, ma ra pi parte dei gnomes no s i sà deboto pi. Almanco l é vanzà chel de ra Graa del Pesc, asache i r à sote i oce dute ci che i passa su ra Ferovia pede ra stazion; canche me scanpa da vardà su, me par de vede l pesc destirà intrà i crepe, che i vece i aea bateà zenza esse mangare mai stade al mar…
Nesto Coleto
Gli altri articoli di “Ladino e dintorni”
Seguici anche su Instagram:
https://www.instagram.com/amicodelpopolo.it/
