Ascolta questo articolo in podcast su Spotify.
Gli altri articoli di “Ladino e dintorni”
In quattro appuntamenti Radio Cortina ha rievocato il programma in ampezzano «Cuatro ciacoles sote gorna», con gli stessi protagonisti di 50 anni fa.
Ei abù acaro che l mè amigo Zesare Molina el m ebe ciamà a Radio Cortina e che ebe podù parlà danoo par anpezan fora par radio. R ocajion r é ruada dai Ladis de Anpezo, e chi del radio i r à azetada alolo. El cajo l à vorù che, par chera ciacolades del lunes bonora, s ebe ciatà danoo chi che, fin dal istade del 1976, i à portà inaante chel programa ciamà «Cuatro ciacoles sote gorna» e dapò deentà «Cuatro ciacoles pede el fornel».
Ci che scrie l à stà là daos del microfono par un an e meso, con Stefano Noce, Flora Diornista epò Zesare, e «Cuatro ciacoles…» l à scodù un gran bon azeto da ra Cortina de inalora, canche con poco se fejea tropo. Parlaon de storia, cultura, betaon su dische, liesaon ’sò dite vece, poesies e stories; con nos ciacolaa tante anpezane, femenes de ciasa, artejane, guardiacaza, guides, pastore; ’sente che ancuoi r aarae passà i zento ane e incraota r aea acaro de podé contà stories, soes e del paes de na ota.
Son deentade madure, e no n é pi chel che aon inalora, canche un ciapo de ’soen se ciataa inze i locai sacagnade de ra «Sottostazione Convertitrice» de ra ferata de ra Dolomites che ades, co ra Stazion fata su noa, deentarà na caserma pa ra Polizia. El paes el s à smagrà, ma in é ancora calchedun che se pensa de chera ciacolades, dinprin duta ra seres e dapò na ota in setemana, che despes es ’sia a fenì con un ’siro inze a Lospedà, agnoche Piero e Rosa bonanimes i pariciaa chenedi col colasc, e l ea festa na sera scì e na sera nò.
Cuante biei recorde! Alcuante i on tirade fora in chera bonora par radio, chi outre i tienon da na banda, parceche no se sà mai. L é beleche vienù fora ra pensada de seguità a ciacolà par anpezan, e mangare ciamà alcuante vece paesane a contà ancora algo, ignante che r Olinpiades es me scofie e de Anpezo vanze solo recorde.
Gramarzé a Nives de Radio Cortina, che r é ancora daante l microfono come ’sà deboto 50 ane, e speron de se ciatà danoo aduna!
Nesto Coleto
