Ascolta questo articolo in podcast su Spotify.
Gli altri articoli di “Ladino e dintorni”
Uno sguardo all’originale edicola eretta oltre novant’anni fa sulla Porta sora el Forno, punto del confine tra le comunità di Ampezzo e di Braies.
Outramente da tante paese ca dintorno, inze duta ra val de Anpezo – almanco fin al dì de ancuoi – ei ciatà solo una ancona (un utriol, o capitel, cemodo che se pó anche ra ciamà). L é chera fata su intor i anes Trenta del ‘900 da no sei ci; da chel che me dijea un amigo, che l aea scrito un libreto par no desmenteà ra storia dei prime zento ane del refujo Biella, l aea da esse stà Carlo Sarteschi, un avocato da Milan che del 1935 l ea l ispeziente del refujo e i piajea ra crodes là daejin.
Un dì aee stà su in conpagnia a vede sta ancona, che ra m aea sapù propio intressante. Sora de era, fata de muro stagno e outa almanco un metro e meso, l ea nafré de cuerto depento de verde; de inze na Madona ra vardaa fora par na gardela de fer e de sote l ea na lapide che no see ‘sù adora a liese polito. R ancona r é stada logada inze un cianton fora man, agnoche no rua su propio dute: su da ra Porta sora el Forno, ra forzela che ra marca el confin intrà Anpezo e Braies, poco pi in su del refujo Biella e agnoche scomenza l troi che l darsonse ra ponta de ra Croda del Beco.
A ra fin, ei ciatà poco e nuia de chera ancona che da pi de nonanta ane ra i stà de sguaita sul refujo là pede e su ra Monte de Fosses, agnoche dute i anes i anpezane i montea ancora un bel rodol de fedes. Ra no sarà cissacuanto «artistega», ma negun in parla: l é un dei segnes de deozion che i nostre vece i aea vorù bete ca e là pa ra val: ra Porta sora el Forno l é un sito agnoche ci che el no n à el fó sote el cu e el no pensa solo a darsonse el Cu de ra Badessa là de sora, el pó anche se fermà, se scentà ‘sò intrà r erba e i sasc, lascià core i pensiere e mangare dì na orazion.
Se calchedun de ci che par solito liese chesta righes, el saesse algo de pi de ra ancona su da ra Porta Sora el Forno, me piajarae el saé, par el bete pede chel che sto colpo ei scrito de ra storia de un sito agnoche pare e mare i m aea menà su che aarei abù suposò diesc ane.
Nesto Coleto
L’articolo è pubblicato nell’edizione cartacea dell’Amico del Popolo n. 12 del 19 marzo 2026, in distribuzione questa settimana (su abbonamento, in edizione digitale e in edicola).
