Ascolta questo articolo in podcast su Spotify.
Gli altri articoli di “Ladino e dintorni”
Sono trascorsi settant’anni dalla scomparsa del grande alpinista ampezzano Angelo Dibona «Pilato», definito «il dominatore del quinto grado su tutte le montagne d’Europa».
Ca de calche dì, ai 21, sarà setanta ane che l é morto Angelo Dibona, par i anpezane Anjeluco Pilato. Nasciù inze a Ciae da Luiji e Veneranda Dimai ai 7 de aprile del 1879, l é stà una de ra pi gran guides che ra storia del ‘sì in croda r ebe abù in duta r Europa.
Par deboto zincuanta ane l à darsonto zentenere de pontes: da ra Francia a r Inghiltera, da ra Svizera fin in Slovenia, par no dì de cheres de ra Dolomites intor ciasa, e l i à dà l gnon a pi de setanta vies in croda, sul gnee e su ra jaza, una anche con un toco de 6° grado.
Na ota l aea abù dito de aé inpiantà, inze ra sò vita, solo dodesc ciode, e l à fato alcuante passaje che al dì de ancuoi i fesc ancora pensà sora ci che l i proa. Par recordà i setanta ane del Pilato, che dal 1976 l à un monumento de bronso inze piaza propio a r onbria del cianpanin, ma l à anche un bel refujo e doa pontes col sò gnon (ra Aiguille Dibona via in Francia e l Cianpanin Dibona sote l Piz Popena), merita tirà fora danoo l libro co ra sò storia, betù aduna da Carlo Gandini, abelì con nossicuanta bela fotografies e stanpà da r UldA ‘sà vinte ane.
El Pilato, che l é ‘sù in croda fin de setantadoi ane, e l é morto poco dapò de ra prima Olinpiades, solo, poereto e deboto desmenteà, l à dassen de esse recordà come un dei fioi pi varentes e piés de insegno che ra nostra val r ebe abù intrà l Otozento e l Noezento. Con el, el turismo e el ‘sì in croda i à fato biei pasc, dijarae deboto soute, inaante: ancora ancuoi su pa ra vies pi nomades marcades «Dibona», dal spigo de ra Zima Granda de Laaredo al Croz del Altissimo e fin a ra Dent du Requin, i và con un gran rispeto, ma pichessee con un grun de amirazion par chi anes, chi atreze, chel corajo, chel gran òn che l é stà Anjeluco Pilato. Ci che scrie, da ‘soen el in à fato poches e gnanche de ra pi defiziles, ma l à istesso acaro podé dì che drio ra zapores del Pilato, alcuanta otes l é ‘sù su anche el.
Nesto Coleto
L’articolo è pubblicato nell’edizione cartacea dell’Amico del Popolo n. 15 del 9 aprile 2026, in distribuzione questa settimana (su abbonamento, in edizione digitale e in edicola).
