Ascolta l’articolo in podcast su Spotify.

Sotto le rocce del Col Rosà, a Nord di Cortina, restano ancora alcuni ruderi di postazioni, testimonianze della cruda guerra di posizione che centodieci anni fa coinvolse la zona, oggi tranquilla meta di escursioni.

Se ei da dì ra verità, con duto chel che ei scarpedà su e ‘sò par i grebane de Anpezo inze zincuanta ane, fin sto an no saee che, intrà tante murate vanzade da ra 1a Guera, in é ancora alcuante che i à gnon «Villa Crea». L é i murate de ra postazios talianes fates su ‘sodalpè del Col Rosà, iusto sora graes de ra Boite e Pian de ra Spines.

Na ota che see su par el Castel de Podestagno, aee ben vedù alcuante buje visavì, ma in chi anes no m inderetae pi de tanto de ‘sì a sciassignà i site de ra guera, e coscita r ocajion r é ‘suda strazada. ‘Sà alcuante dis, un amigo che l ‘sironea par duta ra val e i piaje ciatà fora e fei fotografies a site nafré fora de oula, el min à mandà alcuantes de chi murate, agnoche se liese polito «Villa Crea» e outra scrites.

L é buje, mure, galaries, cenjes fates fora: vien da pensà ce che, ‘sà zento e passa ane, zentenere de melitare che i vienìa da duta r Italia e i no n aea gnanche mai vedù el gnee, i barance, ra viperes, i é stade obligade a fei su: postazios inze meso i crepe agnó stà d istade e dinverno a sciopetà par defende ra Patria.

Ei da dì che no sei nuia de chel che i s à pugnà intor el Col Rosà, agnoche i troes i é stade dute dorade in guera e postazios in é anche de outres, parceche se jea propio sul fronte. Se l é ancora algo in pès, vó ben dì che ra casermetes, ra postazios, i scionz i ea stade fate su polito, e fosc tanta bonbes su par sora no in é ruà.

Ancuoi, zento e passa ane dapò, passà par chi site fesc senpre nafré mal, ma ra storia ra no n à ancora insegnà assei, a vede chel che suzede in ‘siro par el mondo. Anche chi buje inze ra croda del Col Rosà i à da insegnà algo, soralduto a ci che và a curiosà e mangare i smaca anche inze spazadures. Lascioni pura a ra besties del bosco, che de seguro es i tien meo dei ome e, se ‘son a vede, fejonelo con el pi gran rispeto. «Villa Crea» ra se l merita.

Nesto Coleto
Cortina d’Ampezzo