Ascolta questo articolo in podcast su Spotify.
Scrivi «ladino» dentro “Trova in questo show” per ascoltare tutti gli altri podcast nelle parlate bellunesi.
Qualche amara considerazione sul destino dei nostri paesi di montagna, Cortina nel caso specifico, partendo dalle statistiche dell’ultimo numero del Bollettino Parrocchiale d’Ampezzo.
Da anes anorum, in ciou de alcuante mesc al an inze ra ciases d Anpezo rua l boletin de ra Parochia, che l à gnon «Vita Parrocchiale». Pizo e scarmo (el numero de ‘sugno, ruà chiste dis, l à vinte pajines), el se lascia liese vorentiera e l à senpre inze algo de intressante, algo da pensà sora.
Credo che trope de ci che l ciapa e l varda, i se ferme su r ultima pajines, agnoche l é ra «Anagrafe parrocchiale»: i bateade, i morte, i maridade dei ultime mesc. Chera de ‘sugno ra m à dà da pensà pi de outres. Posto che i numere in Comun i disc che ai 30 de aprile del 2025 in Anpezo se jea de 5463, dai 28 de noenbre del an passà ai 30 de maso de sto an (sié mesc!) inze l paes l é stà contà 14 pize bateade (se voron fei el conto, tre cuarte l é sente che fosc ra no stà gnanche ca); l é morto 55 intrà femenes e ome, tre sora i zento ane, e l é stà 7 nozes, 3 de ‘soenote da ca.
Suzede deboto daparduto, da ra Val d Aosta fin ‘sò in Sicilia, che dai paese pi pize e su par outo ra ‘sente ra scanpe garia: parceche i ‘soen i và fora a inparà epò mangare i ciata da lourà in zità; parceche mancia i servizie e poca ‘sente ra s indura a vienì a lourà su de ca e ra stà ca pi de una o doa stajos. Fità un cuartier l é senpre pi ciaro, a cronpà algo gnanche da se bete; deenta ormai duto un lusso, deraotes anche se tuoi un pei de scarpe; parceche… saon beleche cemodo che ra ‘siarà inaante, e cade trenta ane inze sta vales benedetes dal Signor vanzarà solo crodes e poco pi (senpre pi scaderles anche cheres).
No n on ra «bacheta majica» par dì ce che sarae da fei parceche i nostre paese i no more, o almanco i vive nafré meo: l é sote politega, afare, carantane, cuestios pi grandes de nosoutre, e tocia stà a vardà.
Penson ai nostre fioi e neode: ce i vanzaralo de Anpezo? Senpre pi peton, asfalto e fer, senpre manco robes che es invoie a restà inze l paes, se bete aduna, se dà da fei par el ben de dute?
Nesto Coleto
Tutti i testi di Ladino e dintorni
Seguici anche su Instagram:
https://www.instagram.com/amicodelpopolo.it/
