- Le rubriche -

Ladino e dintorni

Chera scendedura sliscia che ra taia l paré

Ascolta questo articolo in podcast su Spotify.
Scrivi «ladino» dentro “Trova in questo show” per ascoltare tutti gli altri podcast nelle parlate bellunesi.

Due parole su una delle più caratteristiche e amate vie delle Cinque Torri d’Averau: la «Fessura Dimai», aperta 93 anni fa da tre provette guide d’Ampezzo.

Ai 31 de agosto del 1932, ‘sà nonantatré ane, l ea de un mercui: no n ea bon tenpo e l gozolaa. Anjelo e Bepe Dimai Deo e Celso Degasper Meneguto, tre guides fortes e pariciades che inalora es aea tropo laoro, es s aea tolesc fora un dì. Inze un pei de ores es aea domà chera scendedura sliscia che ra taia l paré de ra Tore Granda de Naerou, iusto sora l refujo del Lelo.

A chera via, bateada «Fessura Dimai», ancora ancuoi calchedun el i disc «el Ris», a ra todesca. R é longa poco pi de zento metre, ra và su dreta pa ra pionbada a picolon sora l refujo e in chi anes r ea stimada «estremamente difficile». Un toco in su l é un busc agnoche s à ciapà inze e fosc se ciaparà ancora inze ci che rua là; posto che el somea un secel de r agasenta, da incraota i é vanzà propio chel gnon, «el secel».

Par darsonse el paré no se bete pi de un cuarto d ora dal refujo, e fin là se rua su co ra machina; par chesto el «Ris» l à abù alolo un gran bon azeto. I prime a tornà su, ai 18 de setenbre del ‘32, l é stà Emilio Comici da Trieste con Ernani Faé e Fosco Maraini. De l indoman ormai trope i saea de chera scendedura, e coscita l ea ruà outre tre ome: Attilio Tissi, Domenico Rudatis e Carlo Franchetti. Epò, un drio l outro, s à vedù Nazio Dibona Pilato, Canjelo Dandrea Podar e Renato Zardini; danoo Comici con Jane Tutino Steel (ra prima femena che r à fato ra via) e Lucien Devies, franzeje; Bepe Deo con Mario Dell’Oro e Mary Varale da Lecco; Anjelo Deo e Anjelo Verzi Sceco; i Dee con Silvano Poli e Paola Viganò; ancora Nazio Pilato con Alfonso Tanner e ai 13 de otobre Rico Lacedelli Melero e Joani Barbaria Zuchin.

A ra fin, solo inze un mes e meso su par el «Ris» aea beleche stà 25 ome e tre femenes, anpezane, da Belun, da Lecco, franzejes e americane. Ra via ra s aea ormai fato conosce da ci che và in croda; inze i 93 ane che l é passà da chel mercui, cissà cuante de lore che i s à ruscià su par chera scendedura!
Nesto Coleto