Ascolta questo articolo in podcast su Spotify.
Gli altri articoli di “Ladino e dintorni”
Recuperare una vecchia fotografia e osservarla con attenzione ripropone tanti ricordi e disegna storie familiari che si riaffacciano vive nella memoria.
Ci elo che propio l no n à acaro de vede na fotografia vecia de ra sò ‘sente, de ciasa soa, del sò paes? Credo poche: e da na fotografia soutada fora da na casseta dapò de un grun de anes l é vienù fora na storia, fata de tante pestuze che, un pede l outro, i m à parà indrio de pi de zincuanta ane.
Ra fotografia l é r unica che ei dei none da parte de mare. Sarae stà i sò barbes, che i s aea arleà era e mè tata, restades zenza jenitore da pizores: Angelo Bernardi (Uco de l Agnèl) e Anna Girardi (Aneta de Josuè). Uco l ea del 1891 e Aneta del 1898: i s aea maridà del ‘20, i no n aea abù fioi e i s aea tolesc in ciasa ra doa fies de Anjelo de Mente e Vitoria de Josuè, sorela de Aneta, morta de 29 ane con zinche pize.
Inze ra fotografia, fata de luio del 1969 da un scior da Forlì che l aea gnon Giovanni e l é vienù par calche an a passà l istade a ‘Suel co ra femena e i doi fioi, un pizo e na pizora che i ea suposò del nosc tenpo, l é chi che on senpre ciamà none, un pede l outro.
Scentade sun bancia daante ciasa al sol: el, col ciapel che l aea deboto senpre sun testa, era co na traersa, che me penso de i aé senpre vedù inze daòs. El con zapote che someaa i scarpete furlane, era co na vardadura seria, che fosc ra no n aea acaro che i fejesse na fotografia.
Sun bancia, a man zanca, l é un caezal, che l ea un coscin de len fato in ciasa agnoche Uco, che l ea marangon e l aea el banco su inze toulà, el betea un coscin e l se conzaa ‘sò del dapodisnà, dapò de s aé magnà, dute i dis, un bel pomo. Ra bancia, che ra vardaa ra piaza da brite intrà ra ciases de ‘Suel de Sora, e chel caezal el i à dorade fin ai ultime mesc ignante de sin ‘sì, de febraro del ‘83. Ra nona, che ra parlaa poco e con nosoutre famea r ea senpre tanto na bona, ra l aea lascià via par l auton del ‘78.
Ancuoi i none i aarae 130 ane a peròn: ra bancia cissà ce fin che r aarà fato, e i recorde i vien fora garie. Me par de esse ancora là con lore.
Nesto Coleto
L’articolo è pubblicato nell’edizione cartacea dell’Amico del Popolo n. 5 del 29 gennaio 2026, in distribuzione questa settimana (su abbonamento, in edizione digitale e in edicola).
Seguici anche su Instagram:
https://www.instagram.com/amicodelpopolo.it/
