Ascolta questo articolo in podcast su Spotify.
Gli altri articoli di “Ladino e dintorni”
Riportare il proprio cognome alla grafia originaria per riguadagnare parte delle proprie radici: il caso di Marta.
In Anpezo, ancuoi i Majoni i à sié «rame»: Bociastorta, Boto, Coleto, Danèl, del Vecia, de Mano. Pa ra pi parte stajon inze ra val, ma in é inze l Veneto, in Friul, in Jermania e ‘sò pa r Italia. Via par el Piemonte e a Napoli in é outre zepe, che no credo che i ebe a che fei col nosc.
A ra fin del ‘800, che se scriea Majoni l ea 14 «rame», pi del dopio de ades: l ultimo a morì fora, a ra fin del ‘900, l é stà chel «da Ciamulera» con doa soreles soles. Ben, ancuoi nò dute i Majoni i se scrie conpain: mese son Majoni e mese Maioni. No se sà de preziso cara che l é ra scritura pi vecia del casal, che par Richebuono el scomenza del 1548 con un «illi de Maglono» dal gnon «Maio», e par Menegus Tamburin l é l medemo dei Dimai e Demai anpezane e De Meio da Lozo. Par nosoutre, ben s intende, l é Majoni, ma dì un e l outro no muda nuia!
Chesto par dì che na ota i vece Colete i ea mese par banda. Chi 7 del Hotel i ea dute Majoni: mè nono, ultimo de 11, inveze l ea stà bateà Maioni: incraota l ea i prees che tienia i libre dei nasciude e dei morte, e despes scriea inze i capelane, donca i podea anche se falà. Nesto Coleto, vetural, del 1905 l é scrito «Maioni», sote r naia l ea «Majoni» e del ‘26 el s à notà inze inze l Casel come «Majoni». Nos in Comun son stade «Maioni» fin del ‘79, canche mè pare l à domandà al Tribunal de mudà l casal e tornà conpain dei sò vece. L à vorù esse alcuante mesc, cartes e boles, ma a ra fin dal 1980 s on tornade «Majoni», con carta d identità, passaporto, codize fiscale, tessera de r Università da fei noe. L é stà un pas inaante par el rispeto de ra storia!
L an passà chel pas r à l à fato anche Marta Coleta, che ra stà in zità dai anes ‘80, canche sa pare el s aea tramudà con femena e fies par stà pi pede l sò laoro. Ancuoi vo ese istesso cartes, ma el troi par aé danoo l casal dei vece l é stà manco erto: Marta ra no n à zedù, in onor de ra sò ’sente, e ades, da «granda», r é danoo Majoni: come me, son fioi de ‘sarmane!
Nesto Coleto
L’articolo è pubblicato nell’edizione cartacea dell’Amico del Popolo n. 2 del 8 gennaio 2026, in distribuzione questa settimana (su abbonamento, in edizione digitale e in edicola).
