Ascolta in podcast su Spotify.
Gli altri articoli di “Ladino e dintorni”
Perché non fare come altrove, e realizzare qualche «mini vocabolario» su argomenti diversi, iniziando dal tema della salute, degli uomini e degli animali?
‘Sà tenpo m é capità de aé a che fei co na marescia che par anpezan r à un gnon che me piaje: gartura, che sarae «ragade, screpolatura della pelle». Da chel m é sovienù che, de chera maresces in é outres tre pitosc intressantes pa ra parlada: buganza («gelone»), linzinego/lenzinego/inzinego (in ciasa nostra i dijea lenzinego), che sarae «unghiello, formicolio o bruciore sulle dita, primi sintomi del congelamento», e dinultima varsèla («ferita da vergata, striscia sulla pelle per percosse…»).
Cuatro paroles che penso che calchedun el dore ancora; fosc varsèla l é chera nafré pi rara, e che es m à fato pensà sora. Intanto, al dotor Anjelo Majoni, che da medego el conoscea polito dutes cuatro e l aarà abù da res medeà tropa otes, soralduto a ci che louraa inze l bosco, inze l gnee, sote r aga. E dapò: parcé no incrojà i vocabolarie, dal Majoni del ‘29 al Talian-Anpezan de ra Regolers del ‘97, e bete aduna, iusto par l aé, nafré de «vocabolario medico» con inze infezios, maresces e i gnomes del corpo, de ra ‘sente e dei besteame? Cissà cuanta paroles che ormai se disc par talian o ingleje, che se podarae jaà fora danoo! Da ra zopina al mal de ra pèra, da ra nouscia a ra flussion, dal flòster a r intensa, me sà che se se pardarae, inze un ramo de ra storia e de ra parlada anpezana agnoche al dì de ancuoi l é senpre pi paroles, sigles e manieres de dì noes.
In Anpezo l é poco besteame, e donca de ra sò maraties calche gnon l é ‘sù pardù; i dotore de ciasa i é beleche dute da fora e donca el sò vocabolario l é chel talian; su pa ra scatores de ra medejines l é scrito despes par ingleje, e coscita algo no se l dora pi.
Un dì che vienisse ‘sò pioa come cordes o gnee come baretes, me betarei a scartabelà fora i tre vocabolarie e, cemodo che i à fato outre Ladis con vocabolariete de aministrazion, edilizia, informatica e outra cuestios, pó esse che soute fora algo che merita.
Nò par insegnà, ma par no se desmenteà.
Nesto Coleto
L’articolo è pubblicato nell’edizione cartacea dell’Amico del Popolo n. 20 del 14 maggio 2026, in distribuzione questa settimana (su abbonamento, in edizione digitale e in edicola).
