Ascolta questo articolo in podcast su Spotify.
Gli altri articoli di “Ladino e dintorni”
Proponiamo alcune brevi considerazioni sui diminutivi ampezzani in «-uto» «-uta», che nella parlata, a differenza di altre varianti ladine, non ricorrono tanto frequentemente.
In ciou de nafré, al dì de ancuoi nafré de manco de canche ei abù a ce fei con l Istituto Ladin de la Dolomites, capita de pensà sora al anpezan e a ra beleza de chesta nostra parlada; me par de ra conosce assei, ma deraotes r à inze ancora calche «sorpresa» o «mistero». Daantiere son vienù in parlamento con un òn, par via del diminutivo -uto -uta, che inze outra parlades, come l furlan, se ciata despes, anche inze tante casai, e inveze par anpezan no s incroja tante colpe: par via de chesto, ei vardà de bete aduna alcuanta paroles con chera de es tienì da conto.
Inze l sò scrito del 2006 «I suffissi, sostantivali, aggettivali e verbali del dialetto ladino cadorino di Cortina d’Ampezzo (Belluno)» el professor Enzo Croatto l menzona -uto -uta con calche esenpio; el scrito no l ei sote man, e coscita vado a mente. Ei ciatà fora chesta poca paroles, che es no n é inze l vocabolario e ei sentù dorà dutes: «preuto» par dì un pree ‘soen, ordenà da poco; «barghesciutes» par dì barghesces da famea; «todescuto-todescuta» par dì un pizo o na pizora todesche o da inze de ca; gnomes come «Canjeluto» da Arcangelo (recordo Canjeluto Falco, contadin su in Col) e «Canjeluta», «Cheluta» da Rachele, «Cuto» da Francesco, e dinultima doi soragnomes, «Cajuto» del casal Dandrea, che no sei de preziso da agnoche l pode vienì, e «Meneguto» da Domenico-Menego, del casal Degasper.
Un amigo linguista el m à dito che «il suffisso diminutivo -uto -uta, usato in tutto il Cadore, Cortina compresa, pare dovuto al legame originario col Friuli». Donca, chiste alcuante diminutive, che fora par el Cadore se scota tanto de pi, i é ruade inze inze l anpezan da almanco sié o setezento ane: i é poche ma intressantes, e i me fesc vede che inze ra sò longa storia ra val de Anpezo r à tirà su algo da Venezia, algo dal Friul epò algo da r Austria-Ungaria. Ma de duto chel che l anpezan l à ciapà, in é da scrie pa ra otes che vien.
Nesto Coleto
L’articolo è pubblicato nell’edizione cartacea dell’Amico del Popolo n. 16 del 16 aprile 2026, in distribuzione questa settimana (su abbonamento, in edizione digitale e in edicola).
