Ascolta questo articolo in podcast su Spotify.
Gli altri articoli di “Ladino e dintorni”
A ventitré anni di distanza, mi è gradito ricordare il grande lavoro che portò all’edizione della Grammatica ampezzana delle Regole, uscita il 12 novembre 2003.
‘Sà vintetré ane de ste tenpe, ra comiscion betuda su da ra Regoles, che es aea ciamà Luciano Cancider, Ernesto Coleto, Alessandra Nanda, Elisabetta Diornista e Rita de chi de Zinto, r aea deboto fenì un gran laoro. Chel de scrie ‘sò na gramatica noa del anpezan, ra seconda che vienia fora in Anpezo dapò chera del maestro Bruno Nert, stanpada a Trento setantatré ane ignante.
Ra comiscion, nasciuda par voré de ra Regoles, r aea scomenzà da un toco, e co l é dinultima ra s aarae ciatà, in Ciasa dera Regoles e senpre del lunes dadassera, par 97 otes, con suposò 200 ores de laoro. Par scomenzà, r aea tirà fora el libro de Bruno Nert, che r à comedà e adatà al Doimile, e dinultima ra i aea domandà al professor Roberto Pappacena, che l aea azetà de bon saó, de i dà na vardada al scrito par talian.
Dapò de aé betù i sode par stanpà i vocabolarie del ‘86 e ‘97, ra Cassa Rurale ra s aea proferì par pagà anche ra gramatica e coscita, ai 12 de setenbre del 2003, ra Nanda e l Coleto i ea ‘sude inze a Bolsan e i aea lascià là da r «Athesia Editrice» l «discheto» con duta ra fadia de doi ane.
Doi mesc iuste dapò, ai 12 de noenbre, un camion de r Athesia l aea desciarià là da ra Ciasa de ra Regoles ra scatores con inze no sei pì cuante libre de ra «Grammatica», che se vorea i dà fora ai Regoliere e a ci che aea acaro de i bete su su ra sò «scanzia anpezana». Deboto dojento ores de laoro de ra comiscion es ea fenides dutes inze inze 128 pajines co na bela cuerta verde, de un libro scrito con bona volontà e amor par Anpezo.
L é oujorà via vinte e passa ane: doi de chi che i aea dà na man dal 2001 al 2003, Luciano e Rita, i no n é pi ca e i voi recordà, aduna con ches outra doa femenes de ra nostra comiscion. Penso co nafré de pascion a chel che aon dito e scrito inze zento sedutes, d istade e d inverno, senpre con voia de fei e senpre d acordo intrà de nosoutre. Parceche chel libro l ea da l fei, e ades el restarà.
Nesto Coleto
L’articolo è pubblicato nell’edizione cartacea dell’Amico del Popolo n. 18 del 30 aprile 2026, in distribuzione questa settimana (su abbonamento, in edizione digitale e in edicola).
